Comunicado 25-N

Published by Avogados_Novos on

Este ano dende Avogados Novos saímos a rúa o 25 de novembro contra a opresión e violencias sobre as mulleres, todo tipo de violencias (visibles e invisibles) que se atopan arraigadas e normalizadas na sociedade e se constrúen e reproducen en todos os ámbitos das nosas vidas, tanto no privado coma no público, no traballo produtivo e reprodutivo, nos nosos espazos de ocio, na linguaxe, na publicidade, no humor… ideas, actitudes, xestos que atentan contra a autonomía das mulleres e perpetúa a desigualdade actual.

Vemos necesario rachar con todas as formas de opresión que se trasladan na desigualdade económica, social e cultural e que teñen a súa orixe na organización social do patriarcado, onde existe unha posición de superioridade dos homes sobre as mulleres no acceso e uso dos recursos, e seguen ostentando maioritariamente os postos decisorios

É preciso condenar calquera discurso que negue ou xustifique a violencia contra as mulleres, e responsabilizar aos autores por tales mensaxes reprobables. A negación da violencia machista supón ser partícipes dun sistema inxusto e discriminatorio, que coloca as mulleres nunha situación de dominación, explotación e violencia, e normaliza as relacións estruturais de desigualdade.

A data 4 de Novembro, segundo datos da Secretaría de Estado de Igualdade, 51 mulleres foron asasinadas durante o 2019 á mans das súas parellas ou exparellas, 3 crianzas foron vítimas mortais en casos de violencia contra a súa nai, e 48 nenos e nenas quedaron orfos/as a consecuencia destes delitos. Desde o 2003, as vítimas mortais contabilizadas por violencia de xénero é de 1.027 mulleres. 1.027 mulleres foron asasinadas polos seus (ex)maridos e (ex)mozos. É un problema de Estado e como tal debe tratarse.

Para combatelo fai falta medios, moitos medios, a todos os niveis na Administración (educación, sanidade, xustiza, emprego, etc). Porén, o Pacto de Estado contra a Violencia de Xénero segue sen ter a súa dotación económica, e a maioría das medidas recollidas non puideron ser implementadas.

No ámbito da nosa localidade, denunciamos a falta de medios e a precariedade na que se atopa o Xulgado de Violencia sobre a Muller de Vigo, o cal vulnera os dereitos das vítimas e dificulta un traballo efectivo na súa protección, que da lugar á revictimización e, moitas veces, á disuasión da presentación de denuncias por parte das mulleres vítimas. No xulgado de Vigo faltan salas que respeten a intimidade das vítimas e a confidencialidade do seu procedemento (entre outras vítimas que esperan). As instalacións actuais son ineficaces para evitar o encontro entre vítima e agresor. Faltan medios para reducir os tempos de espera.

A saturación do Xulgado é unha evidencia manifesta, que non da abasto coas competencias de instrución e está absolutamente desbordado coas competencias civiles, cos procesos de familia que veñen derivados das denuncias. É imprescindible a creación dun Segundo Xulgado de Violencia que reforce a actividade xudicial nesta materia para respetar os dereitos das vítimas, garantir a súa seguridade e das súas crianzas, e poder dar unha resposta institucional o máis axeitada posíbel.

E falta formación na perspectiva de xénero en todos os operadores xurídicos, e en todo o procedemento xudicial, non soamente na instrución, senón tamén nos xulgados penais.

Queremos trasladar a nosa repulsa ao acontecido na madrugada do 10 de novembro no Xulgado de Violencia sobre a Muller de Vigo, e a nosa preocupación pola falta de medidas de seguridade tanto na entrada dos mesmo como no acceso aos expedientes xudiciais, situación que complica mais o traballo do Xulgado e causa unha sensación de total desprotección das vítimas e unha maior desconfianza no sistema xudicial.

Sobran motivos para saír a rúa e seguir loitando día a día no cotián, por cambios reais e estruturais que removan todos os obstáculos para conseguir unha igualdade real e efectiva entre mulleres e homes.

Vémonos na rúa este 25N, porque querémonos vivas e libres.

Avogacía Nova viguesa

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra politica de cookies consistente en cumplir con las obligaciones previstas en el apartado segundo del artículo 22 de la Ley 34/2002, de 11 de julio, de servicios de la sociedad de la información y de comercio electrónico, tras su modificación por el Real Decreto ley 13/2012, de 30 de marzo, más información aqui ACEPTAR

Aviso de cookies
A %d blogueros les gusta esto: